In 10 Täg werded di beide Iisfälder im Tägi eröffned. Ab em 12i laufd s Eröffnigsprogramm.
D Bauarbeite bim Tägi sind im Ziitplan. Bim Medierundgang hend mir ois chönne überzüüge, wi d Badi, d Saunalandschaft und de Iigangsberich langsm Form aanehmed. D Eröffnig wird miteme Tag vo de offnige Türe am 9. Mai 2020 gfiired werde.
Scho vil witer sind d Bauarbeite a de Iisfälder. Logisch, we me bedenkd, dass d Eröffnig am Sonntig inere Woche, also am 17. November 2019 wird stattfinde. Los gohts ab de Zähni am Morge mit Gratisiitritt uf em Useiisfäld. Um Zwölfi started s Eröffnigsprogramm mit em dureschniide vom Band. Chind werded zur Eröffnig singe, es git en Iislaufshow en Showblock vo de Juniore vo de Argovia Stars und en Iiweihigsmatch zwüschem EV Zug und de ZSC Lions, wo mit gladene Gäscht verstärkt (? 😉 ) werde. Nach em Match wird dann au s deckti Iisfäld fürs öffentliche Iislaufe frei geh und es git ab de Halbidrü am Namittag en Autogrammstund mit Iishockeystars vom EV Zug und de ZSC Lions.
Um Föifi öffnet dann s Fondue-Chalet, wo me sich uf de Terasse devor mit Glüehwy, Punsch, witere Getränk, Chnoblibrot, Flammchueche-Baguettes, Hot-Dog und Crêpes cha verpfläge.
Bis do anne isch no einiges z erledige. D Iischicht uf de Iisfälder isch im Ufbau. Si sell zum Schluss 4 cm dick si und wird jede Tag es grad witer abküehld. Begeischtert isch de Iismeischter Markus Ernst vom noie Zamboni, wo überdacht isch, so dass de Iisatz uf em Useiisfäld bi Rägewetter ned eso müehsam isch.
Im Fondue-Chalet 
De Roli Kuster und de Marco Baumann 
De Markus Ernst im noie Zamboni