De langi Tag vo de Spiel isch en grosse Erfolg gsi

Zum erschte Mol het d Ludothek zum lange Tag vo de Spiel iiglade. Zämme mit em Playland und em Miracoolix het me im reformierte Chilegmeindhuus de ganz Tag chönne spiele.
D Ludothek isch mit ihren XXL-Spiel vor Ort gsi. Speedcups, Mega-4-Gwinnt, Fischlispiel und au s 3×3 Meter Hüetlispiel het grosse Aaklang gfunde. D
Kugelibahn mit eme extra grosse ‘Rollmaterial’ für chlini Chinderhänd isch flissig gnutzt worde und di meh wi 600 Kappla hend chlini und grossi Architekte zu gwagte Baute animierd. S Playland het Spieli für di chlinere Bsuecher aabote und im Ruum vom Miracoolix isch es dann e chli aaspruchsvoller worde.
Wil d Ludothek zum erschte Mol in dem Rahme iiglade het, isch d Spannig gross gsi, wie de Aalass würd bsuechd werde. Erlichtered isch me denn gsi, wo scho bi de Türöffnig Familie druf gwarted hend, endlich chönne loszlege. Bis öppe um 7i am Abe isch Hochbetieb gsi. Vor allem Familie hend die gross Spieluswahl gnutzd und möglichi Idee für Wiehnachtsgschänk gfunde.
Am Abe isch es dann ruhiger worde. Dodemit hend Veraastakter zwar grächned gha, aber gliich uf meh Jugendlichi und Erwachseni ghoffed gha, wo unter fachkundiger Aaleitig noii Spiel wend usprobiere.
S Pauseaagebot vo Popcorn, Sirup, Kafi und Chueche und am Abig e feini Suppe mit Brot sind sehr gschätzt und gnosse worde.
Es isch en tolle Tag gsi und d Ludothek Wettige bedankd sich bim Playland,
bim Miracoolix, bi de Reformierte Chilegmeinde und bi allne Besuecher.