Spektakuläri Üebig vo de Füürwehr

Hüt, Tsischtig, 22. Oktober 2019 het d Füürwehr Wettige en Alarmüebig gha. Es isch um de Absturz vomene Chliflugzüüg gange.

D Aaforderig sind komplex gsi, wo sich de Füürwehr und de ufbotene Sanitär bi de Alarmüebig gschtellt het. Es Chliflugzüüg isch a gschtürzt und het debi es Fahrzüüg in Brand gsetzt. Useforderig sind bsunders de Wassertransport, d Belüchtig vom Schadeplatz und d Explosione gsi, wo sich während de Üebig ereigned hend. Etlichi iichlämmti Persone hend müesse befreit und Verletzi geborge und versorged müesse werde. Sich i de Dunkelheit en Überblick z verschaffe, isch ned eifach gsi. Aber D Füürwehr het zeiged, dass si parat wäre, wenn es settigs Ereignis würd iiträte.

Ei Gruppe het dann während de Üebig no müesse usrücke, um e Ölspur z besitige, wo es Auto uf de Alberich Zwyssigstross hinterloh het.