Wer isch verantwortlich fürs Wettiger Finanz-Desaster?

De Iiwohnerrot vo Wettige wird de Stüürfuess bi de vo geschter uf de Dezember verschobene Budgetdebatte uf 100% erhöche. Das bedüted, dass de Stüürfuess innerhalb vo 10 Johr um 16% gschtige isch, wil es durch de Stüürfuessabtusch mit em Kanton no 3 versteckte Prozent git. Wi het es dodezue chönne cho?

D Frog, wiso d Stüüre eso fescht stiiged, isch im Iiwohnerrot es grosses Thema gsi. D Meinige dazue gönd aber fescht usenand. Vo de bürgerliche Site hets gheisse, de Gmeindrot würd kei Sparwille zeige und d Fraktionspräsidenti vo de SVP, d Michaela Huser het em Gmeindrot vorgworfe, er würd de Entwicklig sit Johre tatelos zueluege.

Anderscht hets bim Lutz Fischer-Lamprecht (EVP) tönd. Er het gsaid, dass «d Senkig uf 87 schlimmer» gsi sig, wi d Erhöchig uf 100%. Begründed het er das dodemit, dass me Inveschtitione im Hoch- und Tiefbau ufgschobe und stattdesse d Stüüre gsenked het. Das räche sich jetzt. Ähnlich het sich de Leo Scherer güsered. Er het ois vo de Wettiger Nochrichte vorgrächned, dass de Gmeind sit de Senkig vom Stüürfuess vo 95 uf 92% im 2004 fascht 31 Millione Franke Stüüriinahme entgange sind.

Ufgrund vonere dringliche Motion vo CVP, FDP und SVP im September 2003 het de Gmeindrot im Oktober es Budget miteme Stüürfuess vo 92% für 2004 vorglegd, so het ois de Leo Scherer brichted, wo letschtendlich vom Iiwohnerrot aagnoh worde isch – trotz Widerstand vo de Finanzkommission. D Finanzkommission, wo damals vom Markus Dieth präsidiird worde isch, het grossmehrheitlich bi 95% welle bliibe und dodefür de Stüürfuess langfrischtig bi 95% welle halte. D Senkige sind dann aber witergange, bis me im 2008 bi 87% gsi isch. De Eigefinanzirigsgrad isch dodebi aber uf tüüfi 30% gsunke. Deshalb isch au de Leo Scherer überzoge, dass di bürgerliche Parteie fürs Finanz-Desaster verantwortlich sind.

Ändere a de Situation cha di Kritik aber nüd, wil me entgangeni Stüüriinahme ja ned nachträglich cha iiziehe. Offesichtlich isch aber, dass de Investitionsbedarf au i de nächschte Johr wird höch bliibe. Wer mit offene Auge durch Wettige laufd und d Gebäud im Gmeindbsitz aaluegd, stösst immer wider uf Bispil für de ufgschobeni Gebäudeunterhalt, wi mir hüt a de Fassade vo de Friedhofchile.