Hüt, Donnschtig, 17. Oktober 2019 trifft sich de Iiwohnerrot zu de 6. Sitzig i dem Johr. Ob d Sitzig sehr lang goht oder kurz, wird sich bim Traktandum 7 entscheide.
Es sind e paar wichtigi Entscheid, wo de Iiwohnerrot hüt am Abe wird fälle. We de Rot di 74 Kürzigsaaträg vo de Fiko würd verhandle, dann gäbs e langi Sitzig, bis spot i d Nacht. Vermuetlich wirds aber ehnder schnell goh, bim Traktandum 7, wil d Fraktionsbricht e Mehrheit für d Rückwisig vom Budget lönd lah erwarte. D Fraktione SVP, FDP und GLP wend gschlosse für e Rückwisig stimme und CVP grossmehrheitlich. Bi de aktuelle Sitzverteilig im Rot werded d Fraktione SP/WettiGrüen und EVP/Forum 5430, wo ufs Budget wend iiträte, kei Chance ha.
«Aufgehoben ist nicht aufgeschoben» heisst es Sprichwort. D Budgetsitzig wird dann am 12. Dezember stattfinde und entsprechend lang duure. Wil s Budget und de Stüürfuess au vom Volk muend aagnoh werde, stoht Wettige vorussichtlich aafangs 2020 ohni gültigs Budget do.