De FC isch Tabelleführer

Geschter, Sunntig, 13. Oktober 2019 het de FC im Stadion Alteburg gege de FC Olte gschpild. Durch en Siig sind d Wettiger jetzt uf em 1. Rang.

Me cha ned jede Match gwünne, werded sich d Wettiger Fuessballer nach de Niderlag vo de letschte Woche z Muri gsaid ha. Aber au nach ere Niderlag muess me wider an sini Stärke glaube und Pünkt hole.

Em FC isch das geschter glunge. Mit em 2:0 durch zwöi Goal vom Labinot Osmani, beidi Goal sind in de 2. Halbziit gfalle, sind alli Pünkt z Wettige blibe. Am nächschte Wochenend stoht es Spitzespiil aa. D Wettiger spiled in Mehli gege de FC Pajde, wo uf em zwöite Platz stoht.