Sit em 1. August 2019 isch de Rüdiger Niederer Gschäftsleiter vom St. Bernhard. Er wird s Alterszentrum vom Lägerehang in d ALTSTADT im Langäcker überführe.
Pünktlich zum 110-jährige Jubiläum vom St. Bernhard isch d Leitig vom Alterszentrum in noii Händ übergeh worde. D Übergangsphase mit de Brigitte Hess, wo nach em Abgang vo de Bernadette Flükiger s St. Bernhard interimistisch geleited het, isch dodemit vorbi.
D noi Gschäftsleiter, de Rüdiger Niederer, isch gschtudiirter Betriebsökonom HWV und Vater vo zwöi erwachsene Chind, schriibd d St. Bernhard AG inere Mediemitteilig. Zuletscht het er d Alterszentre Gäu z Egerkingen gleitet. Nach Abstechern i d Informatik und d Industrie het er sich uf s Gsundheitswese fokussierd.
De Rüdiger Niederer froid sich uf d Useforderige, wo ihn z Wettige erwarted. Mit em Noibau ALTSTADT wot er i de kommunale Alterspolitik Nägel für en überregionali Usstrahlig iischloh. Er isch überzügd, dass es e noii „Denke“ für alternativi Wohn- und Pflegemodelle bruuchd. Us sinere Sicht müend si bedarfsgrecht und uf di jewilige Bedürfnis abgschtimmt si. D ALTSTADT wird dodezue di passende Rahmebedingige biete, isch sich de Niederer sicher.
De Verwaltungsrot vo de St. Bernhard AG isch überzügt, dass de Rüdiger Niederer mit sinere
Kompetenz und sinere unternehmerische Denk- und Handligswis ned numme en
Mehrwehrt für d Institution isch, sondern d Alterspolitik in de ALTSTADT, z Wettige und i de Region witerentwickele wird.