Am Räbhüüsli-Sonntig het me Aktie für di noi Firma chönne zeichne, wo d Nachfolg vo de Wybaugnosseschaft wird überneh. Si sell als Volksaktie d Wettiger Wykultur stärke.
Di höche Temperature hend d Wyfründe ned devo abghalte, bim Räbhüüsli-Sonntig s ei oder ander Glas Wy z gnüsse. Tendenziell hets zwar e chli weniger Lüt gha wi au scho, aber d Räbhüüsli si guet bsuechd gsi und d Stimmig isch ebeso guet gsi.
Am Lägerehang het me au d Möglichkeit gha, d Volksaktie vo de noigründ «Weinstern Wettingen AG» z zeichne, wo d Wybaugnosseschaft sell ablöse. Di isch Ändi Mai ufglösd worde, was zu grosse Änderige i de Produktion vom Wy wird führe. D Volksaktie werded als Namensaktie usegeh und choschtet 500 Franke. Pro Person gits maximal zwöi, bi e Nachfrag, wo s Aagebot duet überstiige, entscheided de Verwaltigsrot über d Verteilig.