Wi d Füürwehr uf ihre Facebooksite mitteild, het si hüt am Vormittag müesse usrücke. En Chuchibrand het vil Rauch verursachd.
En Chuchibrand isch schnell passird, zum Bischpil will me e Pfanne uf em Herd vergissd. Läbesmittel, wo i de Pfanne verbrönne chönnd vil Rauch verursache, es cha aber au Füür uf d Wohnig übergrife. Bim Alarm hüt, Donnschtig, 20. Juni 2019 isch es aber zum Glück glimpflich abgloffe. D Füürwehr het s Übergrife uf d Wohnig chönne verhindere und d Wohnig guet glüfded.
Numme will me scho grad derbi sind: Fascht scho en Standardfehler i de Chuchi isch, we me versuechd en Ölbrand mit Wasser z lösche. Wil s Öl vil heisser wird, wi Wasser, verdampf s Wasser binere Berührig mit heissem Öl sofort und will Wasserdampf meh Platz bruuchd wi Wasser, wird heisses Öl durch di ganz Chuchi gschlüdered, we me das versuechd. Wem d Sicherheit i de Chuchi es Allige isch, set e Löschdecki parat ha, mit der sich au en Ölbrand loht lo lösche.