Am Fritig, 17. Mai 2019 het d Tägi AG en Medieaalass organisiird. De Aalass isch s Betoniere vom zwöite Iisfäld gsi.
Es isch spannend gsi, de Arbeiter zuzluege, wi si d Ammoniakleitige iibetoniered und glichzitig d Flächi vo de Iisbahn so flach wi möglich mached. Über die ganzi Flächi vomene Iisfäld wär e Differenz vo 7 mm erlaubd. De Visar Shtanaj, als Bauführer verantwortlich, dass de Bode möglichscht ebe wird, isch zuversichtlich, dass sini Lüt de Bode fascht uf de Millimeter werded annebringe. D Arbeiter hend es relativ nois Verfahre aagwend, bi dem d Fahrzüüg, wo de Bode glattstriiche, mit Laser uf de Millimeter genau chönnd schaffe. Zudem het e d Qualität vom Beton globd, wo grad vo genegenüber glifered worde isch. Zwüsche 270 bis 280 Kubikmeter sind es pro Iisfäld gsi, wo da iibaud worde isch.
Um die Flächi so anne z bringe, sind verschidnigi Maschine im Iisatz gsi. Di gross Maschine, wo e chli wi en Traktor usgseht, bringt de Bode uf 3 Millimeter genau anne, di zwöit Maschine het numme no e Toleranz vo eim Millimeter und danach chömmed no einisch zwei Maschine zum Iisatz, wo me fascht scho als Poliirmaschine chönnd bezeichne. Im Video chönnd ihr das aaluege: