Am 5. November 2015 het de Gmeindrot e Leinepflicht für Hünd im gsamte Sidligsgebiet bschlosse gha. Us verschidnige Gründ, u. a. wege Iisproche, isch d Leinepflicht bisher ned in Chraft träte. Mit de Veröffentlichung vo hüt, 2. Mai 2019 i de Limmatwelle isch d Änderig vom Polizeireglement (wo aber numme en Teil vom Sidligsgebiet betrifft) rechtskräftig und en Verstoss degege cha büesst werde.
Meh wi drü Johr isch es gange, bis d Gmeind Wettige de §27 Abs. 2 vom Polizeireglement rächtsgültig gändered het. Sit em Donnschtig, 2. Mai 2019 dörfed Hündeler bi Schuel-und Sportaalage, Chindergärte, öffentliche Spiil- und Grüenflächene, Wirtschaftslokal, uf de Friidhöf, im Chloschterareal, am Bächliwäg und em Gottesgrabe und in de Zäntrumszone zwüsche Zentral- und Schartestross vo de Gmeindgränze zu Bade bis zuere Linie Märzegass, Bifangstross und Halbartestross ihri Hünd nüm ohni Leine führe. Alli Hundehalter sind Ändi April über di noi Regelig informiirt worde.
Unmuet het de Informationsbriif vo de Gmeind bsunders bi de IG Hundehalter Wettige usglöst. D Gmeind schriibd nämli, dass di kantonlae Inschtanze im Februar 2019 de Grundsatzentscheid vom Gmeindrot vom Sommer 2018 gstützt hetted. D IG Hundehalter und bsunders de Iisprächer bestrited das aber.
Ois ligd de Entscheid vo de Gmeindabteilig vom Departement Volkswirtschaft und Inneres vor, wo d Sichtwiis vom Gmeindrot numme teilwiis stützt. Es heisst zwar klar, dass d Ufhebig vom Bschluss vom 25. Juli 2018 abgwise worde isch, aber glichzitig het de Kanton d Beschwerde zu de Verfüegig vom 2. Augschte 2018 teilwiis guetgheisse. Zudem wär en Gang vors Verwaltigsgricht notwendig gsi, wo dann en abstrakti Normekontrolle duregführt hetti. Da druf het de Iisprächer verzichtet. Di konkret Überprüefig vo de Rächtsmässigkeit vom definiirte Bereich für d Leinepflicht, so schriibt d Gmeindabteilig vom Kanton, cha erscht erfolge, wenn en Hundehalte büesst wird. D IG Hundehalter bitted us dem Grund uf Facebook drum, dass öpper en allfälligi Buess ned set zahle, sondern sich sofort an d IG z wende, um allfälligi rächtlichi Schritt z prüefe.
Es isch also vilicht ned s letschti Mol, dass ois d Leinpflicht beschäftiged.