Mit de Match im Stadion Alteburg het de FC immer noh Müeh. Au am Samschtig, 27. April 2019 het d Mannschaft, wo in de 2. Liga interregional spild, alli Pünkt em Gegner müesse überlah.
Nachdem es in letschter Ziit bide uswärtsmatch meh Pünkt geh het wi dihei, het me geschter nach em Aapfiff sofort gmerkt, dass de Wille zum Erfolg do isch. Sehr engagiirt sind oisi Spiler in de Match, wobi de Elan relativ bald de Realität gwiche isch. D Spiler vom FC Adliswil, wo ufeme Abstiigsplatz stönd, hend en guete Tag verwütscht und sind en ebebürtige Gegner gsi. Vor allem d Offside-Falle het Adliswil guet beherrscht und so hend vili Wettiger Aagriffsbemühige schpöteschtens geended, wo de Linierichter d Fahne ufeghebt het.
In de 27. Minute isch dann, ehnder überraschend, de Ball im Wettiger Tornetz glanded. En komische Schuss isch es gsi, wo im höche Boge am Goali vorbi im Tor glanded isch. D Zueschauer hend gar nöd recht welle glaube. Wer ghoffed het, dass es i de zwöite Halbziit besser wird, isch enttüscht worde. Immer no het me gmerkt, dass s Heimteam nach em Match uf kein Fall ohni Pünkt wot dostoh, aber mit vilne Fehlpäss und wenig guete Idee, isch es ehnder bi Bemühige blibe, wi bi eme druckvolle Spil fürre. Und immer wieder sind d Stürmer im Offside gschtande. De Drang fürre het dezue gführt, dass d Adliswiler zu Konterchance cho sind und so het es au vor em Wettiger Goal immer wider gfährlichi Szene geh. Zum grosse Entsetze vo de Zueschauer, zumindescht vo dene, wo de Wettiger d Duume druckd hend, hend d Adliswiler in de 94. Minute no 0:2 gschosse. Dodemit sind au d Hoffnige uf wenigschtens ein Punkt verlore gsi. De FC bliibd Dank de Niderlag vom FC Muri gege de FC Olte uf em föifte Tabelleplatz.