Gfährlichi Situatione bim Tägipark

Bi de Zuefahrt zu de Tüüfgarage vom Tägipark isch es am Samschtig, 30. März 2019 immer wider zu gfährliche Situatione cho. Automobilischte sind in d Gägerichtig vo de Eibahnstross d Rampe vo de Jurastross her als Usfahrt bruuchd.
Nach de Vergrösserig vom Tägipark hets Ziit bruuchd, bis d Ii- und Usfahrte endgültig gregled sind gsi. Sit e paar Johr isch es jetzt aber klar: D Zuefahrt erfolgd über d Jurastross  und d Usfahrt über d Tägerhardstross. Am letschte Samschtig, so hend ois Augezüüge brichted, het das Verkehrsregime aber ned funktioniird. In de Tüüfgarage siged d Barriere offe gsi und immer wider sind Fahrzüüg uf de vo obe her linke Spur, wo dütlich als Iifahrt im Einbahnvercher signalisiird isch, us de Tüüfgarage ufegfahre. Dodebi sigs mehrmol zu gfährliche Situatione cho, will glichzitig  Auto d Fahrspur gnutzt hend, um in d Tüüfgarage z fahre.
Mir hend d Leitig vom Tägipark aagfröged, was los gsi isch. Wege em technische Problem, so hend mir zur Antwort übecho, isch s Brandschutztor vo de normale Usfahrt gschlosse gsi. Aber für en settige Fall gits en automatischi Signalisation, wo d Eigetümer-Rampe als Usfahrt uswiist. Zudem sind zwöi Vercherskadette im Iisatz gsi, um de Kunde de Wäg uf d Tägerhardstross z zeige. Leider het en Kund, so d Verwaltig vom Tägipark, fälschlicherwiis d Iifahr Tals Usfahrt bruuchd, Nach Aagabe vo oiserne Augezüüge isch es ned numme eine gsi, sondern innerhalb vo de füf beobachtede Minute grad mehreri. Zudem hend in dere kurze Ziit mindescht zwöi Auto müesse uswiiche, wo in d Tüüfgarage hend welle abefahre.
Aber wi au immer: D Leitig vom Iichaufszäntrum wird d Situation analysiire und notwendigi zuesätzlichi Massnahme ergriife, falls d Analyse zeiged, dass das nötig sig.