Am Samschtig, 16. März 2019 het de FC Wettige de FC Dullike zum erschte Match im noie Johr im Stadion Alteburg empfange. D Wettiger hend bi dem Match zwöi Pünkt verschenkt.
Vor 222 Zuescheuer isch de FC Wettige bi schönschtem Früehligswetter in d Rückrundi gschtarted. D Heimmannschaft het solid gschpild und de Match meh oder weniger unter Kontrolle gha. Kurz vor de Pause und au i de zwöite Halbziit hets aber zwei Grosschance für d Dulliker geh und d Wettiger hend Glück gha, ned in Rückstand z grate. Dass di klar Überlegeheit uf Site vom FC Wettige ned in Tor cha umgmünzt werde, chunnd leider häufiger vor.
E Virtel Schtund vor Schluss hend mir no uf de Tribüne diskutiirt, ob es wohl en Match ohni Goal wird geh, da hend d Huusherre zwöimol zuegschlage. In de 78. Minute het de Pascal Bonnemain s 1:0 und in de 81. Minute de Florian Adili s 2:0 gschosse. Wer gmeind het, de Siig für Wettige sig dademit gsichered – und das sind wohl die meischte Zueschauer gsi – isch bitter enttüscht worde. In de 83. Minute het Dullike de Aaschlusstreffer markiird und in de 86. Minute de Usgliichsträffer gschosse.
Mit 26. Pünkt isch de FC Wettige im Momänt uf em 4. Tabelleplatz vo de Gruppe 5 vo de 2. Liga interregional.