Einisch im Johr finded für di noi iiteilde Füürwehrlüt d Iiführigskurs statt. I dem Johr sind si z Wettige.
Em eine oder andere sind am Fritig, 8. und Samschtig, 9. März 2019 sicher di viele Füürwehrlüt und -fahrzüüg ufgfalle, wo z Wettige si unterwägs gsi. Grund defür isch de Noiiteiltekurs, wo jedes Johr vo andere Füürwehre organisiird wird.
Z Wettige hend a dene beide Täg 87 Aaghörigi vo de Füürwehr (AdF) ihri Grundusbildig übecho. Di 19 Fraue und 67 Männer, wo ihre Dienscht in Füürwehre vo de Bezirk Aarau, Bade, Brugg und Zorzi aafangs Johr gschtarted hend, sind i de Grundlage vom Rettigsdienscht und de Brandbekämpfig gschueled worde. In 12 Klasse iiteild, hend d AdF mit sächs Tanklöschfahrzüüg (TLF) chönne üebe, wo vo de Füürwehre Bade, Schpreitebach-Killwange, Heitersbärg-Rüüstal, Rohrdorf, Untersiggethal und Wettige gschtelld worde sind.
Üebigsobjekt sind a de Bernau-, Tägerhard, Matte- und Lindestross gsi, zudem d HPS, de Werchhof und s Füürwehrmagazin.
Am 22./23. März wird’s en witere Kurs z Wettige geh.