Am Donschtig, 7. März 2019 esch die 14. Generalversammlig vom Kapelleverein Wettige gsi. Vo de total 95 Mitglieder send meh wi en Drittel, nämli 34 Persone im Pfarreiheim St. Sebastian erschene.
De Präsident, de Markus Brunner hed d GV pünktlich am Sebni mit eme Brief ad Mitglieder eröffnet. Aschliessend send d Trakdande, gmäss Liste, Punkt für Punkt, eistimmig ahgno worde. Bem Punkt Wahle hed’s zwei ändrige im Vorstand geh: d Finanze übernimmt neu d Irene Wey-Schwere vo de Ursula Öschger, wo us ziitliche Gründ vom Vorstand zrugg tritt. En herzlich Applaus und en schöne Bluemstruus esch Ihre zum Absched gschenkt wurde. Für d Nicole Zwyssig chond neu de Fabian Schmid in Vorstand und esch zueständig für d Öffentlichkeitsarbeit. Under Verschedenes hed sech de Kapelleverein einstimmig für e Spend vo 3000 CHF usgsproche. Die Spend god nach Indie in Bundestaat Kerela. Im letschte Johr esch es det zonere schwere Fluetkatastrophe cho. De Pater Thomas hed d Mitglieder uusfüehrlich über de Stand vor Ort informiert. Am Schluss vom offizielle Teil heds vom Vorstand no en spezielle Dank gä a d Elke und de Markus Brunner für Ihre unermüedlich Isatz für de Kapelleverein.
De ofizielli Teil hed ca. e Stond dured bevor denn de g’müehtlich Teil hed chönne beginne. D Mezgerei Felder hed en leckere Härdöpfelsalat und heisse Schinke gliefered, einigi Mitglieder händ zom Dessert feini Chüeche selber bached.
Aalles in allem esch es au das Johr weder en sehr glungene Anlass gsi.
De Verein setzt sich für Schutz, Pfleg und Unterhalt vo de Denkmalgschützte Kapelle und Umgäbig ii. Be religiöse Anläss stoht er natürlich als Unterstützig parat und lueged das regelmässig d Kapelle dekoriert esch.
Be Interesse findet mer meh Info do:
oder do:
http://www.wettingen.ch/de/vereine/vereinsliste/welcome.php?action=showverein&verein_id=6567 6f0