Wo mir geschter bi de Raiffiise-Gschäftsstell Wettige a de Schalter hend welle, isch ois empfohle worde, au d Iizahlige am Automat vorzneh. Mir hend ois gfröged, ob d Bank de Schalter abschaffe wot.
Gäldautomate sind öppis praktischs. Ned numme zu de Schalteröffnigsziite sondern 7/24 cha me Bargäld bezieh. Aber au en Automat zum Iizahle gits bi de Raiffisebank scho sit Jahre. D Kundefrequenz isch dete aber dütlich gringer wi bi de Automate zum Gäld go hole, so oise Iidruck. Obs dra ligd, dass me bim Iizahle ehnder Angscht het, dass öppis chönnd falsch laufe und Gäld em falsche Konto zugordned wird? Oder d Angscht, dass sich de Automat verzälld? Mir wüssed es nöd, vermueteds aber. Au de persönlich Kontakt zu de Bankaagschtellte isch für de ei oder di ander en Grund, sini Iizahlige am Schalter vorzneh, statt am Automat.
D Raiffiisebank het jetzt aber en noie, sehr moderne Automat i de Schalterhalle, a den d Aagschtellte ein fründlich aber beschtimmt führed, wem e wot Gäld iizahle. So cha me lehre, wi er funktioniird, was d Kundefrequenz am Schalter dörfd verringere.
Mir hend de Präsident vom Verwaltigsrot vo de Raiffiisebank Lägere-Baregg, de Roli Michel gfröged, ob s Ziil sig, d Schalter abzschaffe. Vo ihm isch es klars «Nei» cho. Im Prinzip ligds am Kundeverhalte, was d Bank aabüted, so de Michel. Zudem sig au witerhin gwähleischtet, dass me während de Schalteröffnigsziite Hilf würd übecho, wenn me ned wüssi, wie de Automat bediene. Au we me de Automat us Prinzip ned wot bruuche, würdi me nach wi vor vo Chundeberoter bediend. Mir hends teschted und au wenn di fründlich Bankaagschtelti e chli verwunderd glueged het, wo mir ois gweigered hend, ois de Automat erkläre z lah, so sind mir tadellos bediend worde.
Wi s witergoht mit de Automate und em persönliche Kontakt bim Ii- oder Uszahle? Das hanged davo ab, was mir Kunde nutze.