Wi d Kantonspolizei (Kapo) Aargau in ere Mediemitteilig schriibd, hets hüt uf de A1 vor und hinterm Baregg mehreri Uufäll geh. D Automobilischte hend bis zu 20 Kilometer im Stau gschtand.
Ned weniger wo füf Uufäll sind es gsi, wo sich am Fritig, 1. März 2019 zwüschem 12i am Mittag und Virtelabzwöi am Namittag in beide Fahrtrichtige ereigned hend. De Uftakt het e 25-jährigi Autolenkerin gmachd, wo in Fahrtrichtig Bärn unterwägs gsi isch. Kurz nach de 12i het si i de Rampe vor em Baregg d Herrschaft über ihres Auto verlore, isch ins Schlüüdere cho, isch dann miteme andere Fahrzüüg zammegschtosse und in e Leitplanke pralld. D Ambulanz het si mit liichte Verletzige ins Spital brochd. Um Virtelabeis isch d Uufallschtell grumed gsi.
Numm füf Minute spöter hets uf de Bademer Site vom Baregg Fahrrichtig Bärn in witere Uufall geh, zum Glück ohni Verletzti.
Praktisch zur gliiche Ziit sind öppe Zähvorzwöi uf de Noiehofer Site vom Baregg zwöi Uufäll passird, in jedere Fahrtrichtig eine. Bi dem i Fahrtrichtig Züri isch e 53-jährigi Frau licht verletzt worde.
De füft Uufall isch dann Virtelabzwöi in Fahrtrichtig Züri widerum uf de Höchi vo Noiehof gsi. Au hiir hets kei Verletzti geh.
Di Uufall hend de Vercher natürli beiiflusst. Bsunders in Fahrtrichtig Bärn hets en lange Rückstau geh, in de Spitze sinds 20 Kilometer gsi. Im Lauf vom Namittag het sich d Vercherssituation dann normalisiird.