In sinere nächschte Sitzig wird de Iiwohnerrot über de Kreditaatrag zur Saniirig vo de untere Landstross entscheide. Für d Stross vom Rabekreisel bis zu de Stadtgrenze zu Bade sind 10’930’000.00 Franke nötig, wobi de Aateil vo de Gmeind bi 8’158’000.00 Franke ligd.
D Landstross K275 isch di wichtigscht Verkehrsachse durch Wettige und wird uf vili unterschidliche Arte gnutzt. Si dient em Sidligsruum zum Wohne, Schaffe und Iichaufe, em Individualvercher – glich ob motorisiird, mit em Velo oder z Fuess – als Verchersachse und unter em Bode zum „Transport“ vo Wasser, Strom, Gas und Informatione.
S vorliigend Projäkt wot uf de ganzi Länge de Oberbau ernoiere und d Kärnfahrbahn vo 7.50 uf 8 Meter verbreitere. So gäbs au meh Platz für d Limmattalbahn. De Kreisel Land-/Staffelstross sell aapassd, de Innering vergrössered und s Kreiselzäntrum instandgstellt werde. Au d Strosse- und Freirüüme selled mit Einzelbäum und Sitzglägeheite noi gschtarted werde. Ab de Liegeschaft Landstross 46 bis zum Chnote Schönau werded d Abwasserleitige und anderi Werksleitige saniird.
De Baubeginn isch für 2021 planed und sell in Etappe vo jewils 100 bis 150 Meter duregführd werde. Durch d Landstross gohts dann numme einbahnig, de Gegevercher wird über d Schartestross gführd. Für d Fuessgänger sed d Baustell jederzit uf beiden Site chönne passiirbar si.
Nach eme allfällige „Ja“ vom Iiwohnerrot muess de Kredit am 19. Mai 2019 au vo de Stimmbürger gnehmiged werde.