De noi Abt vo Wettige isch gweiht worde

Au wenns Chloschter z Wettige im 1841 uf Bschluss vom Grosse Rot säkularisiird worde isch, gits no en Abt vo Wettige. D Weihe vom aktuelle Abt isch am letschte Mittwoch, 2. Jänner 2019 gsi.
Nachdem d Zischterzienser vo Wettige nach em Bschluss vom 13. Jänner 1841 numme 48 Stund Ziit gha hend, um de Kanton z verlah, sind d Mönch vo Wettige einigi Johr umenandzoge. Am 8. Juni 1854 hend si dann in de Nöchi vo Breagaz im Vorarlbärg e noii Heimet gfund: s Chloschter Mehrerau. Sither heisst d Abtei Territorialabtei Wettige-Mehrerau. D Abt het sither de Titel Abt von Wettige und Prior von Mehrerau. Mit em Vinzenz Wohlwend, eme öschtriichisch-liechtesteinische Doppelbürger, wo i de Schwiiz gebore isch, het d Abtei jetzt en noiie Abt. Nach em überraschende Rücktritt vom vormalige Abt Anselm van der Lindem isch de Vinzenz Wohlwend am 1. Auguscht 2018 vom Papscht Franziskus zunächscht als Apostolischer Administrator iigstezt worde. Am 19. September 2018 het ihn s Kapitel vom Chloschter zum noie Abt gwählt.
Am letschte Mittwoch isch dann sini Weihe durch de Generalabt vom Zischterzineserorde, em Mauro-Giuseppe Lepori, in de Chloschterchile z Mehrerau gsi. Dademit isch de Vinzenz Wohlwend de 54. Abt vo Wettige. S Newsportal Vorarlberg Online het usführlich über d Weihe brichted und het en Link zum Livestream veröffentlicht, wo d Weihe au jetzt noch cha aaglueged werde. Durch de Verei vo de Fründe vom Chloschter Wettige bestoht en enge Kontakt vo Wettige zum Chloschter am Bodesee.

Hiir de direkti Link zum Video vo de Weihe: