Mir wünsched allne en gute Start ins 2019!

De Jahreswächsel isch e Glägeheit um Rückschau z halte und fürschi z luege. Und um allne en guete Rutsch z wünsche! Mir mached das au, jedefalls es bizeli.
Zuerscht de Blick uf ois selber, uf d Wettiger Nochrichte: Der Artikel isch de 338. im Johr 2018, dazu chömmed viir Satireartikel, so dass mir fascht en Schnitt vo eim Artikel pro Tag gschaffd hend. Mit de Zuegriffszahle sind mir au recht z fride, obwohl mir weniger «Klicks» wi im 2017 gha hend, sind es dütlich meh wi im 2016. Über d Ursache chönnd mir numme spekuliire. Ischs de Umstiig uf di noi Website gsi, wo ned alli mitübecho hend oder ligds an Facebook mit de veränderte Algorithme? Direkt uf oiseri Site göhnd di wenigschte.

Aber mir wend natürli kei (zumindescht ned numme) e «Nabelschau» mache, sondern au en Blick uf das werfe, wo z Wettige los isch gsi.
Im Sportberiich isch s Highlight sicher de Legendematch zum 25. Jubiläum vo de Noigründog vom FC gsi. Aber au di vorübegehndi Tabelleführig vom FC in de 2. Liga interregional het en Erwähnig verdient.
Ned vergässe dörf me im Zammehang mit em Sport RotWyss! Mit em EuroHockey Indoor Club Cup vo de Manne, wo im Februar im Tägi stattgfunde het und Meischtershcaft und Cupsiig het de Wettiger Landhockeyclub vili schöni Momänt chönne gnüsse.

Baued wird z Wettige au fliisig. D Website 5430wettingen.ch versuechd z dokumentiire, wi Gebäude vor em Abriss usgsehnd und welli Ersatzbaute dafür ersettld werde. Zudem hend im 2018 di beide Drüfachturnhalle chönne iigweiht werde. Di vo de Kantonsschuel und di im Margelächer. Mit zwei Spatestich het sich zeiged, dass z Wettige au d Zuekunft im Blick het. Im März isch de Startschuss für d Saniirig vom Tägi gfalle und im Auguscht het d St. Bernhard AG de Spatestich vo de ALTSTADT chönne fiire. S Inveschtitionsvolume vo beidne Projekt ligd zämme bi wit meh wi 100 Millione Franke.

In Sache Politik isch z bemerke, dass de noi zammegsetzti Gmeindrot sit eim Johr am Schaffe isch und di Debatte im Iiwohnerrot lebhafter worde sind. Bsunders d Budgetdebatte, aber au di letscht Sitzig vom Johr im Dezember wird Beobachter und Teilnehmer in Erinnerig bliibe. Wer sich dafür interessiird, cha uf oiserm Twitteraacount di damalige Livetweets läse. Zudem hets im Iiwohnerrot im erschte Johr vo de Legislatur scho sibe Wächsel geh, eine wegem Tod vom Alt-Iiwohnerrotspräsident, sechs in Folg vo Rücktritt, vo dene drü aber erscht in de Januarsiitzig 2019 endgültog vollzoge werde.

Am meischte aaklickt worde isch de Artikel «En Wettiger chönnd Aargauer Buur vom Johr werde, brüchd aber oiri Unterstützig». De Tobias Lüscher het sich bi de Abstimmig guet gschlage, glanged het es aber leider ned.
Gärn gläse werded au Artikel zu emotionale Theme, wi zum Wettiger Fäscht, em Verkehrsregime a de Schartestross oder zu de Limmattalbahn.

Mir sind gschpannd, was es 2019 alles a Noiem und Brichteswertem bringe wird und froied ois witehrin, wenn ihr ois witerhin Informatione oder fertige Artikel lifered oder au Themene witerleited, wo oich bewege.

Für 2019 wünsched mit oich allne es gfroids , gsunds und glücklichs Johr!