Mit em Rücktritt vom Peter Voser (CVP) us em Grosse Rot, vo dem s Badener Tagblatt in der hütige Printusgab brichted het, wird bi de nächschte Sitzig sin Nochfolger vereidiged. Es isch kein andere wi de Wettiger Gmeindamme Roland Kuster.
Eigentlich isch Roland Kuster bi de letschte Grossrotswahle uf de Grossratslischte vo de CVP im Bezirk Bade de zweite Ersatzkandidat worde. Er het im 2016 genau 160 Stimme weniger wi de Reto Schmid us Bade gha. Wil de Reto Schmid aber verzichtet het, wird de Roland Kuster aafangs 2019 Grossrat werde. Gegenüber vo de Wettiger Nochrichte het er betond, dass es ihm «e bsunderi Ehr und Froid» sig, «Wettige au im Grosse Rot dörfe z verträte». Zudem isch er überzoge, dass es nach vilne Johr Exekutiverfahrig en bsundre Momänt sig, wider in eme Parlament z wirke.