Priise bi Advents-Fotowettbewerb z günne!

Mir vo de Wettiger Nochrichte veraastalted zämme mit em Fotostudio 5430 en Advents-Fotiwettbewerb. Für di drü Beschtplaziirte gits en Priis und di beschte 10 Föteli werded veröffentlicht.
D Adventsziit isch e Ziit vo de Besinnig, vo brönnende Cherze, vo lange Nächt und kurze Täg. Es isch damit au e Ziit, in dere me bsunderi Föteli cha mache, au wenn d Beliechitg vilicht e chli aaschpuchsvoller isch, wi schuscht. Us dem Grund veraastalted mir en Fotiwettbewerb.
D Motiv müend aktuell und uf em Gmeindsbann vo Wettige fotografiirt worde si. Zudem sette si im witeschte Sinn mit em Advent oder de Wiehnacht z due ha. D Fotografinne und Fotografe müend mindescht sächzähni gsi si und ihri Föteli spöteschtens bis zum Fritig, 21. Dezember 2018 per Mail an wettiger.nochrichte(at)gmail.com gschickt ha. Jede dörf bis zu drü Föteli iischicke. E Voruswahl vo 10 Bilder treffed d Veraastalter, di endgültige Plaziirige werde vo de Mitglider vom «Fototreff» feschtglegd, wo sich sit em 1962 fascht jede Samschtig bim ehemalige Foto Lüthard (hüt Fotostudio 5430) a de Seminarstross trifft. Über de Wettbewerb wird kei Korrespondenz gführd und di drü Gwinner werded per Mail informiird. de 1. Priis isch en Fotiguetschii für s Fotostudio 5430 im Wert vo 50.- Franke. Zudem wird d d Foti s Föteli vom Monet Dezember 2018. De 2. Priis isch en USB-Stick vo de Wettiger Nochrichte und de dritti e Tasse vo ois. Bi allne iigschickte Föteli bliibed d Bildrächt bim Fotograf/de Fotografin, d Wettiger Nochrichte und s Fotostudio 5430 dörfed si aber unbegrenzt unter Aagab vom Inhaber vo de Bildrächt für alli Zweck bruuche.

Rechtlichi Hiiwiis: De Rächtswäg isch bim Wettbewerb usgschlosse und es wird drüber kei Korrespondenz gführd. En Umtuusch oder en Baruszahlig vo de Priise isch usgschlosse. D Name vo de 10 Beschtplaziirte (falls so vili mitmached) werded mit de Föteli imene Artikel uf de Wettiger Nochrichte gnennd und d Föteli veröffentlicht. D Aagab vomene Pseudonym isch aber mögli. D Date vo de Teilnehmende werded aber numme für d Durchführig vom Wettbewerb bruuchd.