D Manuela Crameri isch Schwiizermeischterin!

Am Wochenänd sind z Dietike d Schwiizermeischterschafte im Grätturne gsi. D Manuela Crameri het daderbi d Nase vore gha und het Gold gunne.
Wi de STV uf sinere Website schriibd, het d Manuela Crameri bim Wettkampf zeiged, was si uszeichnet: Ihri Nervestärki. Mit dere het si ruhig und konzentriird ihres Chönne am Bode, a de Schaukelring, bim Schprung und am Reck zeiged. Mit 9.45 Pünkt (2. Platz) am Bode und 9.55 Pünkt (1. Platz) bim Schprung het si de 7. Platz a de Ring mit 9.25 Pünkt und de 6. Platz mit 9.35 am Reck sehr guet chönne usgliiche und het mit gsamthaft 37.60 Pünkt de Titel vonere Schwiizermeischteri gunne. Im Nacke het si en anderi Wettigeri gha. D Marina Mäder het mit 9.50 Pünkt am Bode de 1. Platz belegd gha, mit 9.15 a de Ring de 17., mit 9.15 bim Schprung de 12. und mit 9.50 am Reck de 3. Mit 37.30 Pünkt isch si numme drü Zehntel hinter de Manuela Crameri uf em 3. Platz glanded. So sind 2 vo drü Medaille uf Wettige gange! Härzliche Glückwunsch!