Miteme furiose Uftakt sind d Wettiger Futsaler am Samschtig, 10. November 2018 im Tägi in ihre Heimmatch gschtarted. Zudem isch de Christopher Krause verabschiided worde.
Futsal isch e technisch sehr aaspruchsvolli und schnelli Variante vom Fussball, wo in de Halle gschpilt wird. D Maniacs, Schwiizermeischter vo 2016, hend am Samschtig demonschtriirt, dass si das beherrsched. Bim letschte Heimatch vo dem Johr isch es am Aafang Schlag uf Schlag gange. Scho nach zwöi Minute hend d Maniacs 3:0 gführt und nach zwölf Minute het es 4:0 gheisse. D Maniacs hend danach e chli Tempo us em Spil gno, wo MNK Croatia 97 Möglichkeite eröffned het. Mit zwei Goal vor de Pause hend si zeiged, dass si sich ned eifach wend gschlage geh. Di zwöit Halbziit isch dann, vor allem i de letschte 10 Minute hektischer worde. D Aazahl vo de Fouls het zugnoh und d Spiler hend immer wider müesse luege, dass si d Emotione unter kontrolle chönnd bhalte. Föif Minute vor em Ändi vom Match het de Alessandro Facchinetti mit em 5:2 de vorentscheided Treffer glanded und mit witere drü Goal, zwöi in de 38. und eis i de 39. Minute, hend d Manias «den Sack zugemacht».
Abschiid neh hend d Maniacs vom Christopher müesse neh, wo öppe 4 Johr bi de Maniacs gschpild het. Er zügled mit sinere Familie uf Dütschland.
1:0 Alessandro Facchinetti (1′), 2:0 Alessandro Facchinetti (2′), 3:0 Luiz Felipe Farias (2′), 4:0 Luiz Felipe Farias (12′), 4:1 Nicolas Spiegel (18′), 4:2 Ljubisa Palic (19′)
5:2 Alessandro Facchinetti (35′), 6:2 Alessandro Facchinetti (38′), 7:2 Luca Kaltenbach (38′), 8:2 Marco Facchinetti (39′)