Hubertus-Gottesdienscht in de reformiirte Chile

Wenn Jagdhornbläser ineme Gottesdienscht spiled, dann meischt Stück usere Hubertus-Mess. Das isch au am Sunntig, 21. Oktober 2018 eso, wenn d «Fricker Füchs» de Gottesdienscht in de reformiirt Chile musikalisch mitgschtalte.
In de Ziit um de 3. November umme, em Gedenktag vom Heilige Hubertus, het das bi de Katholike und teilwiis au bi de Lutheraner e gwüssi Tradition, zu dere au ghört, dass di örtlich Jagdgsellschaft d Chile herbschtlich schmückd und au Jäger am Gottesdienscht teilnehmed. Für di Wettiger Reformiirte isch es aber vermuetlich  e Premiere, dass Jagdhornbläser im Gottesdienscht musiziired. D Idee d «Fricker Füchs» iizlade, isch em Thomas Bächli cho, eim vo de Sigriste vo de Chilegmeind. Er isch Mitgliid vo de «Fricker Füchs» und wo er letschte Herbscht vernoh het, dass de Pfarrer Lutz Fischer-Lamprecht für d Wettiger Nochrichte mit uf de Triibjagd isch gsi, het er ihn aagfröged, ob er sich chönnd vorstelle, en Hubertus-Gottesdienscht z fiire. Am nächschte Sunntig um Halbizähni am Morge wird de Gottesdienscht stattfinde und Chilegmeind laad alli Teilnehmende aaschlüssend zueme Apéro ii.