De eidgnössisch Dank-, Buess- und Bettag isch en staatliche Fiirtig. Gfiired wird er aber traditionell mit Gottesdienscht, so au am Sunntig, 16. September 2018 z Wettige.
Traditionell find de ökumenisch Gottesdienscht zum Bettag in de Chloschterchile statt und es sind di drü Landeschilene und di evangelisch-methodistisch Chile derbi. I dem Johr isch vo de römisch-katholische Pfarreie de Pastoralassistent Mario Stöckli, vo de Methodischte d Edith Studer, vo de Chrischtkatholike de Pfarrer Wolfgang Kunicki und vo de Reformiirte de Pfarrer Lutz Fischer-Lamprecht beteiliged gsi. De Pfarrer Lutz Fischer het in sinere Predigt di wichtig Arbet unterstriche, wo vo de Chile in und für d Gsellschaft gleischtet wird, aber hüfig us «falscher Bescheidenheit» im Stille würd stattfinde. Es würd sich lohne, s Engagement für d Gmeindschaft z unterstriiche und s Vertraue zuenand z stärke, wo meh und meh verlore goht. Musikalisch isch de Gottesdienscht vom Dresdner Cellist Ulrich Thiem prägd gsi, wo vor allem eigedi Musikstück zu de Psalme zum Beschte geh het.
Nach em traditionelle Singe vom Schwiizerpsalm hend d Gottesdienschtbsuecher noch en Apéro unter de Kaschtaniebäum nebe de Chloschterchile chönne gnüsse.