Immer wider gits Klage, vor allem vo Aawohner, S Wettiger Fäscht sig z lut. S OK het deshalb zum erschte Mol e Lärmgränze verfüegt. Ob me si wot und cha iihalte, wird wohl no zu Diskussione führe.
Maximal 93 Dezibel Lärmemission sind bim Wettiger Fäscht erlaubt. Das het de Gmeindrat so bschlosse und de Wert orientiirt sich am Lärme, wo bi de Badefahrt 2017 und bim Argoviafäscht als Obergränze gilt. S OK het aakünd Lärmmessige vorzneh und, dete wo nötig, iizgriife oder hinterher Gschpröch z führe. D Handballer vom SV Lägere hend in ihre Chloschterbar es Lärmmessgrät installiirt, wo immer de aktuelli Wert aagit. Wo mir geschter si dete gsi, isch de Lärmpegel immer um di erlaubte 93 Dezibel gsi, obwohl wegem Fuessballmatch no kei Musik gloffe isch. Ohne Messige, also rein subjektiv, isch oiser Iidruck, dass es in einige Fäschtzält und au bim Opernair dütlich luter isch gsi. Wi isch oier Iidruck? Isch es oich z lut bim Wettiger Fäscht? Oder isch es guet eso?
Zum Schluss no en Tipp für all di, wo gärn feschte, aber Lärm nöd eso gern hend: Im Rote Hahn vo de Füürwehr gits absichtlich kei Musik, so dass dete en Oase vo – zunindescht relativer – Rue isch.