Vili Fans sind hüt in de Inselarena gsi, um mitenand d Achtelfinale zwüsche Schwede und de Schwiiz z luege. D Enttüschig über d Niderlag isch gross.
Am Tsischtig, 3. Juli 2018 het d Schwiiz versuechd, nach 1954 wider emol de Virtelfinal z erreiche. Scho bald isch z gseh gsi, dass das gege d Schwede nöd eifach wird und de Iidruck, dass d Schwiizer Nati entschlosse uf Siig spild, het me eigentlich nie gah. Wo dann d Schwede in de 66. Minute es für d Schwiiz uuglücklichs Goal gschlosse het, het d Stimmig en zimliche Dämpfer erhalte. In de letschte Minute het me dann de Iidruck übercho, d Schwiizer wend doch noch de Usglich schüsse, aber letschtendlich hends damit vil z spot aagfange. Bim Schlusspfiff isch d Enttüschig i de Inselarena fascht mit de Händ z griife gsi und me het si au in de Gsichter chönne abläse.
