D EVP isch z Killwange unterwägs gsi. Vil nois hend d Teilnehmer chönne erfahre, au über di historische Beziihige zum Chloschter Wettige.
D‘ Regionalpartei EVP Wettige-Limmattal het iiglade für de Spaziergang dur Killwange. Über 20 Persone sinds gsi, wo de Gmeindamme im Garte vom Huus Zürcherstross eis begrüesst het. Das Huus isch vom 13. bis is 18. Johrhundert en Chile gsi, de Heilige Urs und Viktor gweiht. De Chraftort het zum Chloster Wettige ghört. De Abt het denn Altar und Reliquie uf Wettige transportiere lah. D’Gäscht händ di schön restaurierte alte Muure bewunderet. Nochher isch mer em offne Dorfbach no duruf gloffe bis zum Teich, wo als Hochwasserrückhaltebecki gmacht worden isch. De Bach isch es schöns Element im Dorf. Aber es bruucht no meh Rückhalterüüm: Zwöi wiiteri sind planet. Di alte Puurehüser staffled sich sehr schön a dere Strooss, sind guet pflegt und sinnvoll ergänzt. De Volumeschutz bewährt sich, d BNO au.
Im Kunstruum vo de Magdolna Keel hetts sehr asprechendi Bilder. Vorem Schuelhus mit tollem Platz, vor der Chile, am Bahnhof und zletscht im Industriegebiet hed mer ghört, was die chlini Gmeind leischtet; vil Engagement und Solidarität und läbigi Demokratie het mer chönne erläbe: Danke säge d’Gäscht i de Gastgäber, nid zletscht für Füerig und Mittagässe i der Firma Nordfisch AG.