De FC verabschiided sich mit eme Siig vom heimische Publikum

Bim letschte Heimatch vo de Saison 2017/18 het de FC im Stadion Alteburg gege s Team Aargau U-21 müesse aaträte. Wettige isch mit em 3:1 als Siiger vom Platz.

D Saison goht für d Fuessballer vom FC erscht nächschte Samschtig gege Wohle II z Änd. Aber im Alteburg isch am Samschtig, 2. scho de Saisonabschluss gsi. Gege s Team Aargau U-21, wo Ändi Saison ufglöst wird, het d Heimmamnschaft stark aagfange und einige 100%-igi versiibt. D Befürchtig, dass vili nöd gnutzti Torchance irgendwann zumene Rückstand chönnted führe, hend sich nöd bewahrheitet und mit zwei Goal am Ändi vo de erschte Spilhälfti (44. und 45. Minute) het de FC Wettige mit ere beruhigende 2:0-Führig dörfe in d Pause gah. Danach isch de Match usglichener gsi und me het sich immer wider müesse fröge, ob de 2:0-Vorspung zum Siig würd lange. In de 72. Minute isch dann de Aaschlussträffer gefalle und d Sorge sind no einisch grösser worde, bevor in de 82. Minute de Leiven Keller mit eme direkt verwandelte Freistoss zum 3:1 alles klar gmachd hed. Mit 36 Pünkt het de FC Wettige (ein Match vor em Saisonändi) e gueti Plaziirig uf sicher. Als Noiling isch de Klassererhalt s oberschti Ziil gsi und erreichd worde. Entsprächend isch de Saisonabschluss im Alteburg usgibig gfiired worde und mir chönnd ois uf di nächscht Saison in de 2. Liga interregional froie.