D EVP veraastaltet scho sit vilne Johr thematischi Spaziirgäng. Am Samschtig 16. Juni 2018 sell de erschti usserhalb vo Wettige stattfinde.
Killwange, so schriibd d Organisatorin vom Aalass, d Marie Louise Rienert, sig en Ort mit ere interessante Geologie und Gschicht und ere läbesvolle Gägewart. Am 16. Juni ab de Zähni wird si erkundet. De Start isch bim Huus Zürcherstrass 1, wo de Gmeindamme Werner Scherer di Teilnehmende wird begrüesse und goht dann em renaturiirte Bach entlang durchs Dorf und spöter vorbi a Chile und Schuelhuus in es Künschtleratelier und zum Schluss über de Bahnhof bis ins Induschtriigebiet. In de Fischräucherei Nordfisch wird’s e Führig durch de Betriib geh und danach es Z’Mittag. Öppe um Zwöi wird de Aalass vorbi sii.
Iiglade sind alli Interessiirte, si müend sich aber bis zum 1. Juni aamelde. Für de Apéro d Führig und s Z’Mittag müessted d Teilnehmende 25.- Franke zahle. De Rescht wird vo de EVP übernoh. Aamelde cha me sich bi de Marie Louise Reinert entweder per Mail (reinert(@)bluewin.ch) oder Telefon (056 426 99 03).