D Antwort vom ENSI zueme GAU z Beznau I befridiged nöd

Am Donnschtig, 17. Mai 2018 gohts im Iiwohnerrot au um s Poschtulat vom Leo Scherer, welli Folge es plötzlichs und vollständigs Versage vom Reaktordruckbehälter z Beznau I für Folge für Wettiger heti. Vo zwei Fraktione gits zu dere Sitzig scho en Fraktionsbricht und beidi sind nöd zfride.
S Überraschende an de Fraktionsbrichd vo SP/WettiGüen und EVP/Forum 5430 isch, dass si fascht wörtlich s gliiche säge. Aber fanged mir vorne aa: Ineme Poschtulat het de Leo Scherer de Gmeindrot bäte, bim ENSI in Erfahrig z bringe, welli Folge en Super-GAU z Beznau für Wettige hetti und das im Blick ufs Folgejohr und di nächschte 50 Johr. De Leo Scherer het in sim Poschtulat aneme Rechebispiil, wo uf eme ENSI-Brichd basiired, ufzeiged, dass di Temparature im Reaktordruckgfäss sehr nöch a de Gränzwert liged.
D Überwisig vo dem Poschtulat isch numme durch en Entscheid vom Rotspräsident zstand cho, wi mir scho am 30. April brichted hend. Gliichwohl het de Gmeindrot di Aafrag bim ENSI schints gar nöd gstarted. Er stützt sini Antwort uf en Antwort vom ENSI uf en wortgliiche Vorstoss im Iiwohnerrot z Bade. Demnach schlüsst s ENSI es Versage vom Reaktordruckbehälter grundsätzlich us. D Froge nach de langfrischitge Folge beantwortet s ENSI nöd und zwar mit de Begründig, das sig numme nach em Erhebe vo Messwert mögli. Mit dere Antwort sind d Fraktione SP/WettiGüen und EVP/Forum 5430 gar nöd s zfride. Beidi stelled sich d Frog, ob s ENSI di Frog nöd wot beantworte oder es tatsächlich nöd cha. Beides, so isch de Fraktionsbricht z entneh, wär us Sicht vo de viir Partei beunruhigend. EVP/Forum  5430 betond sogar, dass si de Kernenergii nöd grundsätzlich ablehnend dät gegenüberstoh, aber mit de Antwort vom Gmeindrot gliichwohl nüd cha afah.

Liebi Läserinne und Läser: Wi gsend ihr das? Müesst s ENSI nöd es «Worst-Case-Szenario» in de Schublade ha? Oder sind ihr mit de Antwort z fried? Mir froied ois, wenn ihr uf Twitter oder Facebook über di Frog diskutiired.