Sit em 2016 lad di reformiirt Chilegmeind im Mai öpper für e Gaschtpredigt ii. Am Sunntig in ere Woche wird Susanne Hochuli in de Reformiirte Chile a de Etzelstrass predige.
D Susanne Hochuli isch vilicht eini vo de prominenteschte Aargauerinne. Si isch vo 2008 bis 2016 als erschti Grüeni und zweiti Frau überhaupt Regiirigsrötin gsi und isch designiirti Präsidentin vo Greenpeace Schwiiz. Zudem schriibd si immer wider Kolumne für d Zitig «reformiert.», isch Präsidentin vo de Stiftig für Patientenschutz. Uf IIladig vom Pfarrer Lutz Fischer-Lamprecht wird si im Gottesdienscht, wo am Sunntig, 6. Mai 2018 um Halbizähni aafaht, d Gaschtpredigt halte. D Predigt wird sich mit de Frog «Frei wie ein Vogel unter Gottes Himmel?» bschäftige. Aaschlüssend sind alli Gottesdienschtbsuecherinne und -bsuecher zumene Apéro iiglade.
Nach de Bloggerin Kafi Freitag im 2016 und em Blogger Reda El Arbi im 2017 wird d Susanne Hochuli di dritt Gaschpredigerin si, wo als Nichttheologin in de reformiirte Chilegmeind Wettige-Noiehof uf de Kanzle wird stah.