Geschter, Mittwoch, 18. April 2018 isch im Stadion Alteburg de Nachtragsmatch gege NK Pajde gsi. An Spannig isch der Match zmindescht I de letschte paar Minute kaum z überbüte gsi.
Nach de enttüschende Leischtig vom letschte Samschtig, het de FC sich bi sine Fans revanchiird. Vo Aafang aa het me gmerkd, dass s Team es wot besser mache. D Päss sind besser aacho und d Wettiger hend meh Idee gha. Immer wider het me aber au gmerkt, dass de Gegner eine vo de Spitzeteams i de Liga isch. In de 31. Minute het dann de Mattia Girardi s 1:0 für D Heimamnschaft gschosse und mit dem Resultat sind beidi Teams dann zur Pause au in d Kabine. Zmindescht D Wettiger Zueschauerinne und Zueschauer sind zfride gsi.
In de 2. Hälfti vom Match isch de NK Pajde immer wider zu Chance cho und me wi einisch hets im Wettiger Strofruum gfährlichi Situatione geh. In de 63. Minute isch dann de Usglich gfalle und in de 69. isch Pajde in Führung gange. De Schock über de plötzlich Rückstand het me bi de Wettiger Spiler und Zueschauer gschpürt und mir hetted Keim Franke druf gwetted, dass de FC no en Punkt (oder gar drü) chönnd hole. De ei oder ander Fan het sogar s Stadion verlah, damit aber e spannendi Schlussphase verpassd. Beidi Mannschaft sind no zu Chance cho und bis zum Abpfiff isch nöd voruszsäge gsi, ob nöd doch no es Team als Siiger de Platz würd verloh. Bsunders mitgfiibered hend Fans, WO de FC innerhalb vo e paar Sekunden mehreri Chance uf es Siigtoor vergeh hend und Pajde bim aaschlüssende Konter durchus au zu eme Goal hetti chönne cho.
Di letschte 5 Minute cha me do aaluege: https://m.facebook.com/story.php?story_fbid=840237702830528&id=451844651669837