Chrischte fiired in de nächschte Täg ihri wichtigschte Fäscht – au z Wettige!

D Täg vom Grüendonnschtig/Hohe Donnschtig über de Karfritig bis zu de Oschtere sind di wichtigschte fürs Chrischtetum. Bsunders Karfritig und Oschtere! Au bi ois z Wettige finded zahlriichi Gottesdienscht statt.*
Für manchi bestoht Oschtere vor allem us Eier und Oschterhase. Anderi halted (meischt zuesätzlich) a dem fescht, was Oschtere sit vilne Johrhundert bi ois usmacht, d Erinnerig a d Chrüzigung und d Uferstehig vo Jesus.
Hüt am Grüendonnschtig finded in Erinnerig ans letschti Abigmahl vo Jesus vor allem Abendmahlsgottesdienscht bzw. Messfiire statt. En Eucharistii isch um sibni am Abig in de Pfarrchile St. Anton zämme mit de Missione Cattolica Italiana und um Halbinüni in de Pfarrchile St. Sebastian. Danach gits no e Nachtwach bis zum Karfritig am Morge. Di reformiirt Chilegmeind fiired de Abigsmahlsgottesdienscht im Chilegmeindhuss z Noiehof um achti und d Chrischtkatholike um Sächsi am Abig in de Chloschterchile.

Am Karfritig, 30. März 2018 gits im St. Anton verschidnigi Veraastaltige, da drunte d Karfritigsliturgie mit em Antonius-Chor um drü am Namittag, de traditionelle Todesstund vo Jesus Chrischtus. Au im St. Sebsatian finded zur gliiche Ziit d Karfritigsliturgii statt, dete singd de Chilechor. Di reformiirt Chilegmeind fiired um Halbizäni am Vormittag i de Chile z Wettige und d Chrischtkatholike um Halbiölfi in de Chloschterchile. D FEG (Chrüzpunkt) het um Zähni zwei Gottesdienscht und d Baptischte a de Noistrass und d Pfingschtmission (Gmeindzentrum Bethel) a de Seminarstrass fiired au jewils um Zähni, während de Gottesdienscht bi de Noiapostolische scho um Halbizähni aafaht. D Methodischte, chnapp ennet de Gränze, träffed sich uf di Zähni am Vormittag zum Gottesdienscht.

Am Karsamschtig fiired d Katholike d Oschternacht und zwar im St. Sebastian am Abig uf em Chileplatz am Oschterfüür und danach mit ere Eucharistii in de Chile. Au im St. Anton isch en Oschternachtsfiir, si fahd um Halbinüni aa. Scho um Halbiachti started d Chrischtkatholike in de Chloschterchile.

Am Oschtersunntig sind folgendi Gottesdienscht:
9.30 Uhr St. Anton: Eucharistiifiir
9.30 Uhr St. Sebastian: Fäschtgottesdienscht mit Eucharistii
9.30 Uhr Ref. Chile: Gottesdienscht mit Abigmahl
9.30 Uhr Noiaposchtlischi Chile
10.00 Uhr Chrüzpunkt: Moderner und klassische Gottesdienscht
10.00 Uhr Gmeindzenturm Bethel: Gottesdienscht

10.00 Uhr Ev.-method. Chile: Gottesdienscht

* Mir erhebed kein Aaspruch uf Vollständigkeit und bitted um Entshculdigung für allefalls nöd ufgführti Gottesdienscht.

Ersten Kommentar schreiben

Antworten