Überchund d Gmeind jetzt Gäld vo de ChropfChrötte retour?

D Gmeind Wettige het d ChropfChrötte mit ihre Schrottbodenalp, mit dere si bi de Badefahrt Wettige verträte hend, mit eme Biitrag unterstützt. De Iiwohnerrot het 30’000.- Franke Unterstützig und e Difizitgarantii vo 25’000.- Franke für d Baute vom Gaschtroteil gschproche gha. Gits jetzt für d Gmeind Geld retour?
Wi vil de Gmeindrot an d ChropfChrötte uszahlt het, dass isch ois nöd bekannt, aber lut de Grücht, wo mir vernoh hend, sind es meh wi 30’000.- Franke gsi. Wenn di Grücht schtimmd, dann isch klar, dass d ChropfChrötte im Gastroberiich es Defizit gmachd hend, obwohl «öppe 90 Prozent vo de Feschtbeize positiv abgeschlosse hend», wi de OK-Präsident vo de Badefahrt, de Adi Hirzel gegenüber em Badener Tagblatt gsaid het. D Zitig het nämli hüt gmelded, dass alli Verei, wo bi de Badefahrt es Beizli betribe hend, d Hälfti vo de Umsatzabgab retour überchömmed, will s OK vo de Badefahrt finanziell mit eme Plus abgschlosse het. Das isch e guti Nachricht für alli Wettiger Stüürzahler. Wenn nämli d ChropfChrötte Geld retour überchömmed, dann veringered sich s Defizit, was widerum dazu führe müesst, dass sich de Defizitbiitrag vo de Gmeind verringered. D Stüürzahler müend also weniger tüüf in de Hosesack lange.