Morn isch de entscheidend Match z St-Prex

D AFM Futsal Maniacs hend hüt mit eme geniale Match de Usglich in de Best-of-3-Serie gschaffed. Morn goht um de Iizug in de Final um d Schwiizermeischterschaft.

Nach de 1-3 Niderlag vom letschte Wuchenänd hend Wettiger Futsaler hüt im Tägi de zwöit Halbfinalmatch müesse spile. Bimene Siig für Silva währed alli Finalträum usträumt gsi. D Maniacs hend aber vo Aafang aa dütlich gmachd, dass si wend gwünne und sind no in de 1. Halbziit mit 1:0 in Führung gange. Kurz vor Schluss vo de Halbziit, genau uf 0:01 isch d Uhr gschtoppt worde, het Silva en Penalty übercho. Für de Goali vo de Maniacs, wo en Wahnsinnsmatch mit vile super Parade gespilt het, het i dem Fall de Goali gretted, so das d Maniacs mit dere 1:0-Führig in d Pause hend chönne.

In de 24. Minute hend Wettiger Fans no s 2:0 bejublet, aber scho im Gägezug isch s 2:1 gfalle. Bis zum 3:1 sind dann no einisch 10 Minute vergange. Silva het denn de Goali durch en Feldspiler ersetzt und zwöiehalb Minute vor Schluss de Aaschlussträffer zum 3:2 gschosse. De Match isch in dere Phase uuuspannend gsi und wo d Maniacs einehalb Minute vor Schluss s 4:2 gschosse hend, isch de Jubel no dütlich stärcher worde wi vorher. E halbi Minute vor Schluss isch de Ball wider ins leere Goal vom FC Silva, wi scho bim Goal vorher. Damit isch de 5:2-Sieg perfekt gsi.

Morn, Sunntig, 11. März 2018 isch de entscheidend letscht Halbfinalmatch am Genfersee. De Siiger wird in de Final um d Schwiizermeischterschaft iiziehe und mir vo de Wettiger Nochrichte drucked de AFM Futsal Maniacs d Duume!