Iiwohnergmeind het endlich es gültigs Budget

S Budget mit ere effektive Stüürfuesserhöchig vo 3 % isch an de Urne dütlich aagnoh worde, aber ufgrund von ere Stimmrechtsbeschwerde nöd gültig gsi. Jetzt het d Gmeind endlich es gültigs Budget.
Vil Wirbel hets um d Budgetabstimmig vom 26. November geh, wil d Gmeind di «versteckti» Stüürerhöchig in de Abstimmigsfrog nöd klar deklariird het. De Alt-Iiwohnerrot Thomas Bodmer (SVP) het deshalb bim Regiirigsrot e Stimmrechtsbeschwerde iigreicht, über di jetzt entschide worde isch. Wi s Badener Tagblatt in sinere hütige Printusgab schriibd, het de Kanton d Beschwerde abgwise, obwohl «d Abstimmigsunterlage aneme Mangel liide» und d «Unterlage offensichtlich unvollständig sind». S kantonali Gsetz hätti de Gmeindrot verpflichted, di drüprozentig Erhöchig klar uszwiise. Wil de Gmeindrot in de Limmatwelle informiirt het und au d Medie breit über den Fauxpas brichted hend, sig de Mangel witgehend behobe worde. Zudem sig s Budget so dütlich aagnoh worde, dass en andere Usgang bi korrekte Stimmrechtsunterlage nöd z erwarte sig si.
Ab dere Woche dörf de Gmeindrat somit alli Usgabe mache, wo budgetiirt sind. Bisher isch das uf di gebundene Usgabe, also Löhn, Sozialhilf und ähnliches beschränkt gsi.

Ersten Kommentar schreiben

Antworten