De Umbau vom Facebook-Algorithmus cha ois schwer träffe

Was me gseht, we me uf Facebook unterwägs isch, entscheided vor allem d Algorithme. Noi wot s Unternähme, so het de Gründer Mark Zuckerberg mitteild, de Nochrichte vo Fründe de Vorrang vor Site vo Unternehme geh. Was guet tönt, het au e schwirigi Site.
D Wettiger Nochrichte sind durch e Facebook-Persone-Site gross worde, wo sich «Wettiger Nochrichte» gnennt het. So isch d Site v.a. ab em 2015 starch gwachse. Vo 12’079 Sitezuegriff im 2015, über 56’262 im 2016 uf 98’534 im 2017. Wo Facebook ois dann zwunge het, de Account uf en ächte Name umzstelle, isch d Facebook-Site zum Glück scho guet frequentiirt gsi, denn de gröschti Teil vo de Zuegriff uf oiseri Site chunnt nach wi vor über Facebook. Wenn Facebook jetzt d Site vo Unternehme (zu dere au oiseri Site zählt, obwohl mir Geld dri stecked) wot hinte aastelle und di vo Fründe stärke, dann het das bsunders zwei Konsequenze: Ihr gsehnd oisi Poschts nümm oder fascht nüm und wenn ihr vergässed, ab und zu bi ois vorbizluege, überchömmed ihr nümm mit, was mür über Wettige z brichte hend. Di zweit Konsequenz isch, dass mir müesste zahle, um witer wahrgnoh z werde. Dafür hend mir aber keis Gäld und wend das au ned (vermuetlich isch s Gäld de eigentlich Grund für d Umstellig).

Was mir dagege chönnd mache isch, dass mir oisern Persone-Account wider aktiviired und versueched, konsequent alli Artikel dete z teile. Das isch hüt scho passiirt.

Meh Möglichkeite hend ihr selber. Entweder ihr lueged regelmässig uf oisere Site vorbi, also uf wettiger-nochrichte.ch oder uf de Facebooksite, oder ihr aboniired oisern Newsletter. Der wird ni vollständig si und je nach Zit, wo ois zur Verfüegig stoht, gits seltener eine, aber immerhin.

Mir hoffed jedefalls, dass ihr ois witerhin troi sind und wend oich au troi bliibe.

Ersten Kommentar schreiben

Antworten