AFM Futsal Maniacs hend überzügd!

Mit Spannig hend di beide Teams und Zueschauer de Match erwartet. Züri gege Aargau, de 4. gege de 5.! D Futsal Maniacs us Wettige hend mit 12:3 en dütliche Siig chönne realisiire.
Zumindescht am Aafang isch es en umkämpfte Match gsi, wo am Sunntig, 7. Januar 2018 in de Sporthalle vom Tägi stattgfunde het. Beidi Teams hend sich nüd gschänkt. Bald het sich dann aber en erschti Tendenz zeiged, will d Wettiger nach numme föif Minute scho 2:0 vorne gläge sind, aber 2:1, wo in de nünte Minute gfalle isch, het bis kurz vor de Pause Bestand gha. Dann isch es Schlag uf Schlag gangen. in de 18. und de 19. Minute het de Alessandro Facchinetti sini erschte beide Goal gschosse, so dass d Maniacs mit ere beruhigende 4:1 Führig in d Puse hend chönne gah.
D Hoffnig uf en Heimsiig in dem wichtige Match gege d Leue us Züri hend d Maniacs dann gard nach de Pause unterstriche. Nach numme föif Minute in de zwoite Hälfti het es scho 7:1 für d Maniacs gschtande, nach de Hälfti vo de zwoite Hälfti 9:1 und zwüsche de 36. und de 38. Minute het de Alessandro Facchinetti en Hattrick annebrochd und mit em 12:1 isch klar gsi, wer d Pünkt wird mitneh. Gliichwohl sind d Zürcher bemüht gsi, no echli Ergebniskosmetik z betriibe und hend in de letschte Spiilminute no zwei Goal chönne mache. Mit em Schlussstand vo 12:3 für d AFM Futsal Maniacs sind di beide Mannschafte immer no uf de Plätz 4 und 5, aber hend d Plätz tuuscht. Wettige isch damit zum erschte Mol über em Strich, wo zur Teilnahm an de Playoffs berechtiged.
Mir vo de Wettiger Nochrichte drucked Duume, dass das Saisonziil erreichd wird.

AFM Futsal Maniacs – Futsal Löwen Zürich 12:3 (4:1): 3. Krause 1:0; 5. Reinert 2:0; 9. Constancio 2:1; 18. A. Facchinetti 3:1; 19. A. Facchinetti 4:1; 22. Fernandes Coelho 5:1; 23. A. Facchinetti 6:1; 25. Fernandes Coelho 7:1; 28. Reinert 8:1; 29. Reinert 9:1; 36. A. Facchinetti 10:1; 37. A. Facchinetti 11:1; 38. A. Facchinetti 12:1; 40. Goli 12:2; 40. Rodrigues 12:3.