Concertino met em Klarinettechor Wettige

D Unterschied chönnted nöd grösser sii: Do de Klarinettechor Wettige, wo d Zuhörer mit 34 Klarinettiste ond eme warme, orgelähnliche Klang i sin Bann zieht. Det d Solistin Manuela Fuchs, wo sich mit ihrer Trompete virtuos dur wildi Melodie ond gwogti Harmonie spielt. De Klarinettechor Wettige wartet a sine Konzert im Januar 2018 wieder mit spannende ond lohnenswerte Hörerlebnis uuf.
De Olivier Truan, Komponist vo vielne Theater- ond Filmmusike ond Mitglied ond Hofkomponist vo de Klezmer-Band Kolsimcha, hed eigens för die aktuelli Konzertserie vom Klarinettechor es Konzert för Trompete ond Klarinettechor gschriebe. I de drüü Sätz vo demm brandneue Wärk setzt de Komponist verschiedensti Stilmittel ii, so dass d Trompete als Soloinstrument ond de Klarinettechor als Orchester glänze chönd. Klassischi Phrasen, osteuropäischi Folklore ond Jazz-Kläng ergänzed sich in natürlicher Art ond Wiis. Vom dunkle, de Chilenorgle ähnliche Klang vom Klarinettechor differenziert sich d Trompete mit ihrer klare Tongebig. Es entstoht es wonderbars Gesamtbild, wo d Trompete über es Meer vo Klarinettetön flügt.

Nebst demm absolute Höhepunkt bringt Sie de Jerome Moross i d Wiiti vom Amerikanische Wilde Weste, die japanisch Klarinettistin Micina zeigt Ihne es Stadtbild im Popstil ond mit em Toshio Mashima flaniered Sie dor Paris.

Gnüssed Sie de Klarinettechor Wettige 2018 i de

Aula vom Schulhuus Margeläcker am
Samstig, 20. Januar 2018, am 8 Zobig
Sonntig, 21. Januar 2018, am 5 Zobig

Chile Heilig Geist Zürich-Höngg
Sonntig, 28. Januar 2018, am 5 Zobig

De Iitritt esch frei – Kollekte
(pg)
Pressefoto2

Ersten Kommentar schreiben

Antworten